معاقبه طفل بذكاء افضل الطرق لمعاقبه طفلتك

عايزة تعاقبي بنتك؟ عاقبيها كده..
==================

"موبايلك"😡..
كام مرة قلتي الكلمة دي لما تتنرفزي من بنتك علشان مثلا اتخانقت مع أخوها أو اتكلمت معاكي بأسلوب وحش و بتاخدي موبايلها منها.. و بعدين، رجعت تكرر نفس الغلط تاني..

لو فاض بيكي و خلاص شايفة إن بنتك لازم تتعاقب سواء على أسلوبها الوحش في الكلام أو إنها أهملت في امتحانها أو عملت أي حاجة تستوجب العقاب من وجهة نظرك.. خدي بالك من حاجة مهمة جدا..

⚡️ العقاب مينفعش يبقى انتقام .. مينفعش يبقى فش غل.. و مينفعش يبقى طريقة تنفسي فيها غضبك..

⚡️ الهدف ميبقاش  تكدير و تعذيب و خلاص و يفقد معناه.. الهدف لازم يبقى إنها تتعلم من الأخطاء دي..

عن أنس بن مالك رضي الله عنه، عن النبي صلى الله عليه وسلم قال: "كل ابن آدم خطاء، وخير الخطائين التوابون"..

⚡️ علشان كده مدارس التربية المختلفة بتسميها عاقبة مش عقاب consequence not punishment.. و أنا شخصيا بحب اتباع التسمية دي.. ليه بقى؟؟..

⚡️ علشان العقاب بيبقى عبارة عن تسبب في ألم و وجع وخلاص.. و بيتربى خوف شديد من الخطأ عند البنت و ممكن متغلطش قدامك تجنبا للعقاب مش عن اقتناع..

⚡️ لكن العاقبة  هي إنها تعرف غلطها وتتحمل مسؤولية تصحيح الخطأ ده.. فالنتيجة هي إنها فعلا بتتعلم بس من غير إهانة.. متستهونوش بتحمل مسؤولية الخطأ و تصحيحه، لأنه مش سهل و اللي بتتعود على ده بتبقى شخصية قوية لما تكبر..

📌📌علشان تنفذي عاقبة و تبقى فعلا مؤثرة effective  ، خدي بالك من الآتي:

1. العاقبة لازم تبقى منطقية و مرتبطة بالفعل، يعني متدوريش على أي حاجة تحرميها منها و خلاص. متستسهليش إنك تقولي هاتي موبايلك.. لو موبايلها السبب في إنها سقطت في الامتحان، خديه.. كده عندك ألف حق.. لكن لو كسرت مراية العربية و هي نازلة متنرفزة، إيه علاقة الموبايل باللي حصل؟؟..

2. متعاقبيهاش بحرمانها من الحاجات اللي بترفع ثقتها بنفسها.. زي مثلا الاشتراك في عمل تطوعي هي بتحبه أو رياضة هي متعودة عليها.. و متحرميهاش من إيفنت كبير مش بيتكرر غير من السنة للسنة زي حفلة التخرج ال graduation ceremony  في مدرستها أو ال MUN  أو أي إيفنت كبير هي بتحب تحضره و مبيتكررش علشان.. هتندمي بعدها ندم شديد وهتفضل تلومك عليه طول عمرها .. متحرميهاش من الحاجات الوحيدة اللي بتتنفس فيها..

3. متعاقبيهاش عقاب مركب، يعني ميبقاش حرمان من الموبايل و كمان من الخروج و كمان صحابها ميزوروهاش.. متقفليش عليها كل المتنفسات..

4. متطوليش في الحرمان، مش شهور، مش أسابيع .. متخليهاش تبعد عن صحابها كتير علشان ميبقاش منظرها وحش.. و تفقد مكانتها اللي بتبني فيها بالعافية و كمان تبقى تريقة القعدات كلها..

5. متهدديش أبدا.. اللي تقوليه لازم يتنفذ، علشان كده لما تتنرفزي أوي، متتسرعيش في الرد على بنتك بعقوبة.. اسكتي خمس ثواني علشان تبقي أهدى.. إذا مش قادرة to control your temper  خالص، يبقى قوليلها أنا هدخل أوضتي دلوقتي و أخرج بعد شوية..

6. قواعد البيت و توزيع المسؤوليات لازم تبقى دايما واضحة و محددة علشان متبقاش محل خلافات كتير ..

7. تغافلي و فوّتي إذا قادرة تسيطري على اعصابك لما بنتك ترد عليكي بقلة ذوق مثلا، يعني قوليلها إنا مش قابلة الأسلوب ده، لأنه مش بس مش مناسب، لأ ده كمان مبيخلينيش أفهم اللي انتي عايزة تقوليهولي..

شاركيني معاقبة نفذتيها و بنتك اتعلمت منها ...
منقول 🌷🌷🌷