طريقه تحضير المسقعه
 |
| طريقه تحضير المسقعه |
المكونات :
كيلو بتنجان
كيلو بندوره معصوره و متصفيه
فلفل أخضر
فلفل حار حسب الرغبه
بصل صغير سليم حسب الرغبه
٥ حصوص توم مفروم
٣ معالق كبيره خل
ملح وفلفل و كمون
زيت للقلي
احمه
الطريقه :
هنقشر البتنجان و نقطعه شرايح و نرش عليه ملح و نتركه ساعه لحد ما ينزل ميته عشان ميشربش زيت و بعدين نصفي و ننشفه بمناديل مطبخ و نقلي في زيت متوسط الحراره مش سخن اوي عشان البتنجان ميتحرقش و مش بارد عشان ميشربش زيت و نخلي لونه دهبي و نطلعه على مناديل مطبخ و نحمر الفلفل الأخضر و الحار و البصل الصغير يدوب كله ياخد لون فاتح مش هنسوي تسويه كامله .
هنجيب حله و نحط فيها معلقتين زيت و ننزل عليه التوم نقلبه لحد ما ياخد لون دهبي و ننزل عليه الخل و بعدين عصير الطماطم و ملح و فلفل و كمون و نسيب الصلصه تتسبك و تتقل ،بعد ما تتقل نضيف نص كوباية ميه و نسيبها تغلي و نطفي عليها
هنجيب طاجن و نعمل فيه طبقات من البتنجان و الصلصه و الفلفل و البصل و نغطي الطاجن و ندخله فرن سخن نص ساعه و نكشفه في الاخر عشان يتحمر و بألف هنا
ملحوظه :
_ ممكن نضيف شرايح بطاطس محمره في نص الطاجن و ممكن نضيف حمص مسلوق مع المسقعه
_ المسقعه باللحمه المفرومه و البشاميل نفس الطريقه بس بنضيف عصاج في النص و نغطي بطبقة بشاميل
_ البصل الصغير المحمر ده اختياري ممكن نستغنى عنه
المشاركات
تعليقات