قصه كامله
انا (نيفين) عندى 40 سنه اتجوزت من رجل أعمال عربى عيشت معاه سنين طويلة بس سعادتى ماكملتش ومات وسابلى ثروة كبيرة انا مليش حد فى الدنيا دى غير اختى (نجوى) وصديقة عمرى (فريدة) دى كانت صاحبتى من أيام المدرسة وكانت اقرب ليا من اختى بكتير ، نجوى كنت بشوفها كل فين وفين بس كانت دايماً بنتها (دينا) بتزورنى ، الثروة اللى سابهالى جوزى كانت عبارة عن مصنع وشقة كبيرة وعربية كنت انا اللى بديره بعد وفاته
ربنا ما كرمنيش بأى اطفال وانا خلاص وصلت للأربعين وفقدت الأمل واللى كانت بتعوضنى عن ده بنتى (دينا) بنت اختى كانت حنينة أوى عليا وكانت بتعاملى زى امها او من غير مبالغة أفضل من أمها
عدت شهور كتير وناس نصحتنى ان اتجوز لإن مش هقدر ادير المصنع لوحدى وان لازم اعيش حياه جديده والكلام ده بس انا كنت برفض وشايفة ان خلاص نصيبى كده لغاية ما غيرت رأيى ، وده بعد ما اشتغل فى المصنع شاب جديد اسمه (هانى) كان شاب وسيم وطموح كان عنده 25 سنه من غير مبالغة كان شايل المصنع كان بيعجبنى شغله أوى
مع الوقت كان بيتقرب منى بس من غير تجاوز طبعاً مره فمره حصل اعجاب بيننا ، وطبعاً حكيت ده لصاحبتى (فريدة) وكانت أول واحدة شجعتنى وقالت لى لازم تعيشى حياتك انتى لسه صغيرة ومش عجوزة وأى حد يتمناكى
فكرت فى كلام صاحبتى ومرت الأيام وانا وهانى بنقرب أكتر من بعض وصارحنى بحبه ومن غير الدخول فى تفاصيل اتفقنا على الجواز كانت صاحبتى فرحانة أوى عكس أختى (نجوى) اللى كانت رافضة ده تماماً بس انا خلصت اخدت قرار واتفقنا على الجواز وعملنا فرح كبير وكان اجمل يوم فى حياتى وكإنى بتجوز من أول وجديد وقضينا اسبوع العسل فى شرم الشيخ وكانوا أجمل أيام فى حياتى
هانى عشان ظروفه ماتسمحش انه يجيب شقة قعدنا فى شقتى مؤقتاً على ما يجيب شقة مستقلة انا كنت فى الأول رافضة ده وشايفة اننا واحد بس (هانى) صمم على رأيه وقال انا مش هعيش فى شقة مراتى ولازم اجيبلك شقة تليق بيكى ، بصراحة احترمته أكتر وقولتله: خلاص يا حبيبى زى ماتحب
عيشنا اجمل أيام وهانى مسك المصنع وبقى مسئول عنه كان محترم وحنين أوى كنت مبسوطة ان اختيارى طلع صح ، أختى (نجوى) كانت متغيرة معايا من ساعة ما اتجوزت وانا رغم كده كنت بكلمها وطبعاً (دينا) ماكنتش بتسيبنى وكانت بتكلمنى دايماً فعلاً انا بعتبرها بنتى اللى ماجبتهاش ونجوى رغم كده مش بزعل منها رغم تغيرها معايا ، أما بقى (فريدة) دى اللى كانت معايا دايماً وعمرها ما سابتنى ولا اتخلت عنى (فريدة) فعلاً كانت اكتر من أخت ليا وهى كان ليها الفضل بعد ربنا فى السعادة اللى انا فيها دى بعد ما صرفت نظر عن الجواز والارتباط تانى بس (هانى) غير الفكره دى خالص من دماغى ، بس طبعاً زى مامعروف تأتى الرياح بما لا تشتهى السفن وبدأت رحلة العذاب
البداية كنت فى البيت نايمة جنب (هانى) وقلقت من النوم وخرجت فى الصالة عشان ادخل المطبخ بس لمحت زى خيال حاجة بتجرى على أربع رجلين بسرعة على المطبخ ، بصراحة جسمى أشعر وخوفت بس حاولت اطمن نفسى ان دى تهيؤات وممكن ده بسبب ان لسه صاحية من النوم ومش مركزة قربت على المطبخ وولعت النور ومالقتش حاجة واتأكدت ان دى كانت تهيؤات ودخلت نمت جنب (هانى) واليوم مر عادى
تانى يوم حصل نفس الموقف قومت من النوم وبرضه لمحت الخيال اللى بيجرى ده بس المره دى على اوضة النوم قلقت وجريت على الأوضة وولعت النور بسرعه لقيت (هانى) قلق وقالى خير يا (نيفين) ايه اللى مصحيكى دلوقتى ؟
بصتله كده وانا متنحه وقولتله ماحستش بحاجه
تتببببببع
الجزء الثانى من القصه👇👇
بسرعه لقيت (هانى) قلق وقالى خير يا (نيفين) ايه اللى مصحيكى دلوقتى ؟
بصتله كده وانا متنحه وقولتله ماحستش بحاجة دخلت الأوضة؟
- حاجة ايه دى انا كنت نايم وقلقت من النور لما ولعتيه اطفى النور يلا وتعالى نامى
وسمعت كلامه ونمت وانا جوايا قلق مش عارفة من ايه ونمت عادى ومرت ايام والحياة بقت عادية والخيال ده مابقاش يظهر وعرفت ان كان بيتهيألى
لغاية ما الأحداث بقت تزيد بشكل بشع وأولها لما كان (هانى) فى المصنع واتأخر وفضلت منتظراه لغاية ماروحت فى النوم على الكنبه وقومت دخلت عشان انام شوية عشان اكون فايقة لما هانى يرجع وروحت فى النوم بس صحيت على صوت نفس جامد أوى من ورايا! معقولة ده صوت هانى هو رجع من الشغل ونام على طول كده ولسه بقول: انت جيت امتى يا حبيبى والنفس زاد وطلع منه صوت مش بنى آدم مستحيل يكون بنى آدم كان صوت حيوان بيزوم كان صوته مرعب اوى وعرفت ان اللى ورايا ده مش هانى ولا بنى آدم أصلاً ، الصوت بيزيد وانا مرعوبة وماعنديش الجرأه أبص ورايا قلبى بيدق بسرعة حاسه انه هيتخلع من الخوف وفى لحظة الصوت ده اختفى لما باب الشقة فتح اخدت نفس عمييييق وكنت هطير من الفرحة لما سمعت صوت (هانى) قومت وانا جسمى متكسر عشان اجرى عليه واترمى فى حضنه وهو مستغرب اوى وبيقولى مالك يا (نيفين) جسمك بيترعش كده ليه؟
قولتله: انا خايفة أوى يا هانى من قبل ما تيجى كنت نايمة وحسيت بنفس جامد ورايا وصوت بيزوم كان صوت مخيف أوى زى مايكون صوت كلب ولولا انت جيت انا كان زمانى مُت من الرعب
- بعد الشر عليكى يا حبيبى ده أكيد كابوس وانتى شكلك مرهق تعالى يلا نتعشى انتى وحشانى أوى
- بس انا متأكده ان كنت صاحيه يا هانى صعب يكون كابوس انا بدأت اخاف من البيت ده مع ان طول عمرى عايشة فيه مش عارفه ايه اللى حصل
- يا حبيبتى انتى ليه بتكبرى الموضوع ده كابوس اكيد وبعدين مفيش حاجة اهو انتى بس ماتفكريش فى حاجة ولا توهمى نفسك ، مش يلا بقى نتعشى انا ميت من جوع
وحضرت العشا وانا بقنع نفسى ان ده كابوس واللى حصلى من كام يوم دى كانت تهيؤات!
تانى يوم اتصلت بفريدة وحكيتلها واتخضت اوى عليا وقالتلى انا جيالك حالاً ومفيش ساعه ولقيتها عندى عشان تطمن عليا وحكيتلها كل حاجة وقالتلى نفس كلام (هانى) ان دى تهيؤات وان اعصابى تعبانة والافضل اننا نغير جو فى أى مكان ، وخصلنا وقامت عشان تمشى مسكت فيها وقولتلها لازم تتغدى معايا ، واتصل بيا هانى وقالى انا خلصت بدرى وجاى
قولتلها شوفتى حماتك بتحبك اهى هانى كمان خلص بدرى وجاى ليكى نصيب تتغدى معانا ومفيش نص ساعة ولقيت هانى على الباب وفرح اوى لما لقى فريدة هو بيعزها جداً لإنها كانت السبب فى جوازنا عكس (نجوى) علاقتهم كانت سيئة جداً مش عارفة ليه ومش عارفة ليه نجوى كانت رافضة الجوازة دى؟! على العموم ربنا يهديها
واتغدينا مع بعض وفضلنا نتكلم كتير وفريدة بدأت تقنع هانى اننا نغير جو:
- بقولك ايه يا هانى انتوا محتاجين تغيروا جو شوية وكمان (نيفين) مش عاجبانى وبعدين الحياه مش كلها شغل كده يلا جهزورا شنطكم وسافروا أى مكان
- هانى: على طول كده مش لازم اظبط امورى فى المصنع ويعرفوا ان هسافر كلها يومين وهظبط امورى ونسافر أى حته تختارها (نيفين)
خلصنا الغدا واتكلمنا كتير وودعت (فريدة) ولقيت دينا بتتصل بيا وأول ما هانى شاف رقمها وشه اتغير ، كلمتها وقالتلى ازيك يا خالتو وحشتينى انا عارفة ان مقصرة معاكى بس انتى عارفة الجامعة وكده حقك عليا ، وفى وسط الكلام قالتلى ان ماما بتسلم عليكى وهى ماكنتش بتتصل عشان كانت تعبانة شوية ، قولتلها اديهالى بسرعة وحصل عتاب بسيط بيننا وخلصت المكالمة ان اختى وبنتها هيتغدوا عندى بكره وقفلت معاهم وهانى متعصب قولتله مالك بس يا حبيبى؟
- انتى عارفة كويس ان اختك بتكرهنى ومفيش عمار بينى وبينها وكفاية موقفها من جوازنا
- خلاص يا هانى ده موضوع وعدى واختى طيبة اوى وكمان ما اقدرش امنعها من بيتى
- خلاص انا هفضل بكره فى المصنع طول اليوم وكمان اظبط امورى عشان نسافر سامحينى مش هقدر اكون موجود معاكم
- قولتله وانا زعلانة: خلاص زى ماتحب بس ما تتأخرش عليا
وعدى اليوم واختى جاتلى هى ودينا وقعدنا نرغى كتير لغاية مامشيوا ووصل هانى واتفقنا خلاص هنسافر كمان يوم الغردقة نقضى يوم نريح اعصابنا فيهم
حجزنا يومين قضينا يوم جميل وجى وقت النوم واحنا نايمين حسيت بحركة فى الأوضة وشوية حسيت بنفس الهوا السخن بس المره دى فى وشى وبيقرب منى اوى حسيت بنفس الخوف اللى حسيت بيه فى شقتى فى القاهره فتحت عينى وياريتنى ما فتحتها لقيت عينين بتنور فى الضلمة ببص اكتر لقيت كلب اسود قاعد على رجلى وبيزوم ، انا بقيت اترعش من الخوف الكلب ده دخل ازاى! مستحيل يكون كلب كان شكله مرعب اوى حاولت اصرخ عشان اصحّى هانى صوتى مش بيطلع بحرك ايدى عشان اهزه اصحيه جسمى اتشل كله ، قلبى بيدق أوى وجسمى ولسانى اتشلوا والكلب او الشيطان ده بيقرب عليا وانا بتمنى اموت ولا إنى اعيش اللحظات دى ، بقى يقرب اكتر وحاسه بأنفاسة وصوته المرعب ، بقيت اقرا أى حاجة حافظاها من القرآن فى سرى وهو بيقرب كملت قراية فى سرى وغمضت عينى لغاية مابعد عنى وعرفت لما انفاسه بعدت عنى فتحت عينى بكل صعوبة عشان الاقيه بيرجع لورا وبيختفى فى الضلمة ومجرد ما اختفى صرختى طلعت وهانى قام مفزوع من نومه
- حصل ايه مالك يا نيفين كنتى بتحلمى ولا ايه؟
- لا مش بحلم والله ماهو حلم الاوضة اللى احنا فيها دى مسكونة من شوية كان فى شيطان على هيئة كلب قاعد على السرير وانا مش قادرة اطلع صوتى
- طالما صوتك مش قادر يطلع يا (نيفين) يبقى كابوس معروفة
- لا قولتلك مش كابوس انا عارفة كويس مش كل حاجة تقولى كابوس احنا لازم نمشى انا عاوز ارجع مصر
- هو احنا لسه قعدنا ده اول يوم يا نيفين لسه مش معقولة هنبوظ الاجازة عشان كابوس
- انا هقوم اجهز شنطتى وبلاش تقولى كلمة كابوس دى عشان بتعصبنى المكان ده مسكون اكيد حد اتقتل فى الغرفة دى
- اتقتل ايه بس! ايه جو أفلام الرعب ده طب نغير الغرفة يا ستى طالما مصممه انها مسكونة
- لا احنا هنمشى من الفندق كله يا هانى ، ومع إصرارى هانى قام جهز الشنط عشان ننزل مصر واحنا نازلين وخارجين من الفندق قالولنا ايه اللى حصل يا افندم حد زعلكم فى الفندق هنا؟
هانى قالهم لا ابداً مفيش حصل ظرف طارئ فى مصر ولازم ننزل
انا بكل سذاجة قولت هو فى حد مات فى الغرفة اللى احنا كنا فيها؟
لا ابداً يا افندم مين اللى قال الكلام ده؟!
- الغرفة دى مسكونة ولسه هحكى لقيت هانى بيقاطعنى: اظن خلاص كده متشكرين يا جماعه وخرجنا من الفندق وهانى بيقولى: مسكونة ايه وزفت ايه انتى عاوزة الناس تقول علينا مجانين مش كفاية هتسفرينا فى نفس اليوم
رجعنا مصر ونفسيتنا زى الزفت ، دخلنا الشقة وهانى غير هدومه وقالى انه هينزل المصنع ، قولتله هو اهم حاجة عندك المصنع وانا اتحرق!
- انا اخدت اجازة عشان نسافر نغير جو وانتى اللى عكننتى علينا اقعد فى البيت اعمل ايه؟ ممكن تتصلى بفريدة تجيلك شوية ، انا مخنوق ومش طايق اقعد فى البيت
وسابنى ونزل وسمعت كلامه واتصلت بفريدة وجاتلى طبعاً عمرها مابتسيبنى فى أى مشكلة وحكيتلها كل حاجة ولامتنى كتير وقالتلى من حق هانى يزعل الراجل واخد اجازة ليكى مخصوص وتجبريه يرجع فى نفس اليوم
- ماهو غصب عنى يا فريدة انا كنت هموت من الرعب انا متأكده ان الفندق ده مسكون
- مسكون ايه بس يا بنتى انتى اللى بقى يتهيألك حاجات كتير واضح ان اعصابك تعبانة يا نيفين ماتروحى لدكتور طيب واطمنى على نفسك
- فريدة انا مش مجنونة انا مش بيجيلى تهيؤات انا واثقة ان اللى شوفته حقيقى
اتكلمنا كتير واخدت نصايح منها وحاجات من دى وعدى اليوم عادى ورجع (هانى) اتعشينا وصالحته بعد كده ونمنا وحلمت حلم غريب اوى حلمت بنفس الكلب اللى ظهرلى فى الغردقة وواقف بعيد بيحفر فى الأرض وانا بقرب عليه وانا مش قادرة أسيطر على نفسى ببص حواليا لقيت مقابر وصحيت من النوم عشان ادخل الحمام وانا فى الحمام النور قطع عليا فتحت الباب عشان اخرج لقيته مقفول جامد حاولت احرك الأكره برضه مش نافع خبطت على الباب عشان (هانى) يسمع ولا هو هنا الغريب ان الدنيا كانت نور بره النور قطع فى الحمام بس ببص من تحت الباب لقيت خيال لأربع رجلين بيروح وييجى انا جسمى اتشل من الرعب لإن عارفة ان دى مش رجلين إنسان وفى لحظة لقيت مخالب من تحت الباب بتحاول تدخل وانا بعد ماكنت بحاول افتح الباب بقيت سانداه بإيدى عشان الكلب او الشيطان ده مايدخلش عليا بقيت اصرخ وانا فى الحمام والمخالب دى بتحاول تدخل من تحت الباب وفجأه نور الحمام اشتغل وبرضه المخالب لسه موجودة مخالب سودة مليانة دم بقيت اصرخ اصرخ لغاية ما حد خبطنى على راسى واغمى عليا صحيت من النوم لقيت نفسى على السرير وهانى جنبى وبيقولى ايه اللى حصل انا قومت لقيتك واقعة فى الحمام حصل ايه بالظبط؟
- انا لو حكيلتك هتقولى كابوس وتهيؤات ، البيت ده بقى مسكون يا هانى نفس الكلب ظهرلى وكان عاوز يدخل عليا الحمام
- برضه كلب يا نيفين خلاص كل حاجة بقت مسكونة طب الفندق وقولنا يمكن فيه حاجة كمان البيت اللى عايشة فيه سنين اتسكن فجأه نيفين انتى بقى يتهيألك حاجات غريبة
- برضه مصمم انها تهيؤات خلاص يبقى انا اتجننت بقى يا هانى
تتببببببع
الجزء الثالث والاخيرررر👇👇
- برضه مصمم انها تهيؤات خلاص يبقى انا اتجننت بقى يا هانى
- يا حبيبتى بعد الشر عليكى من الجنان انا ليا واحد صاحبى دكتور ممكن نروحله بكره ونشوف عندك ايه معلش اسمعى كلامى وهتبقى زى الفل ان شاء الله
سمعت كلامه وروحنا لدكتور وقعد يتكلم معايا وحكيتله كل حاجة بالتفصيل من أول الخيال اللى شوفته مرتين فى الشقة وصوت النفس اللى كان ورايا وانا نايمة والشيطان اللى على هيئة كلب اللى ظهرلى فى الفندق فى الغردقة وظهرلى امبارح فى الحمام وخلصت كلامى
بدأ يقولى كلام الدكاترة النفسيين المعتاد: دى هلاوس وان اعصابى تعبانة وان ده شعور بالوحدة عشان هانى اتشغل عنى فى المصنع وحاجات من هذا القبيل وكتبلى على ادوية امشى عليها وخلصنا الجلسة وروحت عشان اتفاجئ بعدها بمده بسيطة ان فريدة جيالى بعد ماعرفت وجاتلى عشان تطمن عليا وان هانى اتصل بيها عشان تقعد معايا الأيام دى على مايظبط اموره ويقعد معايا لغاية ما اخرج من المحنة دى وقعدت معايا فريدة وكانت مهتمة بكل حاجة اكلى ودوايا كانت بتعاملنى زى الطفلة ورغم ان كنت سعيدة بده بس كنت حزينة اوى وزعلانه من أختى اللى هجرتنى لمجرد ان اتجوزت شخص مش عاوزاه
ومرت الأيام ورغم مواظبتى على الدوا بس رجعلى تانى الشيطان ده بقى يظهرلى حتى وانا مع فريدة مجرد ما بتختفى من قدامى بشوفه فى كل مكان
لغاية ما هانى جالى وقالى انا هقعد معاكى خلاص الأيام دى ومش هسيبك ابداً كنت مبسوطة اوى بكده كان معايا دايماً وشالنى كتير انا مش عارفة كنت هعمل ايه من غير هانى وفريدة ، لغاية ما الأمور زادت أوى عن حدها كنت نايمة جنب هانى كالعاده وبحضنه لقيت ايدى مسكت فى شعر بحركها على جسمه لقيت شعر كتير اوى بتفح عينى لقيت الكلب الإسود ده بعيونه اللى بتنور وانيابه اللى كلها دم خرجت منى صرخة رجت المكان كله عشان الاقى هانى بيجرى عليا وبيحضنى وانا بقوله انا نفسى اموت خلاص تعبت بجد ، قالى انا مش هسيبك ، واتصل بفريدة وجاتلى وحكيتلها على اللى حصل وقالتلى:
مش كل حاجة بتتعالج بالطب النفسى انتى شكلك ممسوسة يا نيفين وحلّك عندى انا حكيت اللى بيحصلك ده لجارتى وقالتلى حلها عند الشيخ (إدريس) ده راجل بركة وهيعرف عندها ايه
لقيت (هانى) بيبص باستغراب وبيقول لفريدة: معقولة يا فريدة هنروح لدجالين على آخر الزمن! انا مستحيل اروح لدجالين
- ده مش دجال يا هانى وبعدين نجرب ونشوف طلع دجال هنعرف بس جارتى قالتلى ده راجل بركة وملوش فى شغل الدجل والشعوذة
انا كنت حاسة بيأس وواقفت على كلامها يمكن الاقى حل للى بيحصلى ده واتفقنا نروح للشيخ (إدريس) ده
وروحنا لبيته كان فى منطقة شعبية ومن غير الدخول فى تفاصيل كان بيت عادى وناس كتير منتظره وست بتاخد مننا فلوس وقالتلنا لو محصلش العلاج هتاخدوا الفلوس تانى ، ودخلنا للشيخ إدريس راجل كبير فى السن شبه الموميا قدامه بخور كتير حكيتله عن كل حاجة وبعد ما خلصت قالى ده يا بنتى عمل سفلى واللى متسلط عليكى من أقوى انواع الجن وصرفه صعب جداً وهدفه انه يدمرك يا بنتى
طب مين اللى عمل كده انا عمرى ما اذيت حد فى حياتى!!
فجأه مسك ورق وقعد يقرا كلام مش مفهوم وحرقه وبقى يرمى عليه مواد غريبة بعد كده بصلّى وقالى انتى ليكى اخت واحدة بس صح؟
- قولتله اه ليه مالها؟
- مفيش يا بنتى ممكن تبقى لوحدك معايا؟ هانى بصله وقاله بعصبية يعنى ايه تبقى لوحدها انا مش هقوم ، فريدة قالتله ماتخافش يا هانى مش هيتأخر وانا قولتله ماتقلقش عليا يا هانى انا هبقى كويسه
قام هانى وفريدة خرجوا بره استنونى ، بعد كده لقيت (إدريس) بيقولى بصى يا بنتى انا مش عارف اقولك ايه بس واضح انك مرتاحة وفى ناس طمعانة فيكى وللأسف اقرب الناس ليكى
- عاوز تقول ايه يا عم الشيخ وضح؟
- اختك دى على اد حالها يا بنتى وكان رافضة جوازك صح؟
- بكل ذهول واستغراب: صح
- على حسب ماظاهرلى يا بنتى ان العمل اللى اتعملك من اقرب حد ليكى عشان فلوسك
- انت كداب مستحيل اختى تعمل كده ، صوتى بقى عالى لقيت هانى وفريدة دخلوا عليا وهانى وعينه كلها شرار بيقولى: عملك ايه الراجل ده قولى؟
- مفيش يا هانى لازم نخرج من هنا انا غلطانة ان جيت معاكم
- هانى مسك فى الراجل وقاله انت عملت ايه ليها انطق قبل ما اخنقك؟ ساعتها إدريس حكاله كل حاجة ، سابه وأخدنى انا وفريدة وروحنا البيت وبدأ يتكلم ويقولى كلام الشيخ (إدريس) للأسف مقنع
- بصتله بذهول وقولتله: انت بتقول ايه يا هانى مش معنى انك بتكره اختى انك تتهمها الاتهام الخطير ده اختى عمرها ما تئذينى
- نيفين تقدرى تقوليلى ليه اختك رفضت جوازنا؟ مع انها عارفة انك وحيدة اقولك انا ليه؟ عشان فلوسك وانتى عارفة ان اختك على أد حالها اختك شايفة ان متجوزك طمع وشايفة انها اولى بفلوسك ، بصى يا نيفين انا مستعد اطلقك لو دى فيها راحة لأختك وممكن تسلمى المصنع من بكره
- انت بتقول ايه يا هانى انا لا يمكن اسيبك بس انا مش قادره اتخيل ان اختى تئذينى
- تقدرى تقوليلي ليه اختك قطعت فجأه وليه بعد مازارتك آخر مره بقى يحصلك كل ده وحالتك اتدهورت
ببص لفريدة عشان تقولى أى حاجة بتسكت ، ويعيد هانى سؤاله تانى: ليه يا نيفين اختك مش بتزورك خالص وليه بنتها بس اللى بتتابعك
- لا يا هانى (دينا) دى بنتى عمرها ماتعمل كده وممكن بقى نقفل عن الموضوع ده ولو سمحتم انا عاوزة ابقى لوحدى
فريدة اخدت هانى على جنب وقالتله ماتزعلش منها الصدمة كانت كبيرة عليها واخدت بعضها ونزلت وهانى نزل يوصلها وانا دخلت اوضتى وفضلت اعيط مش مصدقة اللى حصلى معقولة يا نجوى تعملى فيا كده انا عمرى ما اذيتك! وفى عز ما انا بعيط لقيت (دينا) بتتصل بيا بقيت مش عارفة ارد ولا لأ وقررت ما اردش خالص ، كنت اتمنى اموت وما ابقاش فى الموقف ده فضلت اعيط وانا لوحدى سمعت صوت الباب وكإن حد داخل قولت تعالى يا هانى ادخل وسمعت صوت انا عارفاه كويس صوت الكلب اللى بيطاردنى دايماً فضلت قاعده مكانى وهو بيقرب وبقيت حاسه بمخالبه على ضهرى وانا جسمى بيترعش وانفاسه بتقرب منى وانا بتمنى اموت عشان ارتاح من العذاب ده مخالبه بتغرز اكتر فى ضهرى وانفاسه بتزيد ورايا وخلاص عرفت ان هموت ونطقت الشهادة عشان الاقى (هانى) داخل عليا وقعد جنبى بيواسينى ماحستش بنفسى غير وانا بروح فى النوم وحلمت بنفس الحلم حلمت انى فى المقابر والكلب بيحفر كالعاده قربت منه وهو شغال حفر بصيت حواليا حسيت ان المكان ده مألوف بالنسبالى مع انى عمرى ماروحته وصحيت من النوم ومر اليوم زى اللى بعده والخيالات مش بتروح وهانى نزل المصنع وانا فضلت لوحدى والجرس رن عشان اتفاجئ بدينا بنت اختى وهى بتحضنى وبتتأسفلى دخلت وقعدنا مع بعض رغم حزنتى بس فرحت أوى بدينا ده مهما كان بنتى ، قالتلى انتى لازم تغيرى جو شوية شكلك مش عاجبنى خالص ايه رأيك نخرج بكره نغير جو ؟
- قولتلها طب والجامعه؟ قالتلى تتحرق الجامعه المهم انتى يا قمر
قولتلها حاضر انا عاوز اغير جو فعلاً وكملنا القعده لغاية ما مشيت وقولت لهانى بس وافق رغم الضيق اللى ظهر عليه بس عشان عارف حالتى ، اتصلت بدينا وخرجنا وفهمت هانى ان هتأخر شوية وخرجنا وطول الوقت سرحانة ومش قادره ان اختى تعمل فيا كده ومش قادره اكلم دينا فى الموضوع ده لإن اكيد مش هتصدق وكمان عشان ماتتصدمش وفى وسط اليوم حسيت بتعب وطلبت من (دينا) تروحنى وقولتلها انا بقيت احسن انا هطلع البيت وكلها شوية وهانى راجع وطلعت وفتحت الشقة وسمعت حركة وصوت بيتكلم كان صوت هانى ولسه هتكلم بس سكت لما سمعته بيقول: انا خلاص زهقت من سى زفت بتاعك ده كل شوية عاوز فلوس من ساعة آخر مره روحناله وهى مش بيشبع فلوس وهى ولا بيحصلها حاجة وشكلنا هنموت قبلها انا بعد بكره هروحله ودى آخر مره هياخد فيها مليم انتى فاهمه؟
وقفل بعد كده وهو خارج من الاوضة انا قفلت باب الشقة وأول ما شافنى وشه اتغير وقالى انتى جيتى امتى؟ قولتله انا لسه داخلة حالا ً بس ايه المفاجأه انت جيت بدرى النهارده خير؟
- لا ابداً انا كنت جاى اخد حاجة وراجع بس خلاص طالما جيتى انا هقعد معاكى ، ها انبسطتى النهادره؟
- الحمد لله (دينا) خرجتنى خروجة حلوة كنت محتاجاها من بدرى ربنا ما يحرمنى منها
- اااااه طيب ، طب انا هدخل اخد دش ونخرج نتعشى بره ايه رأيك؟
- اللى تشوفه يا حبيبى ، وأول ما دخل الحمام مسكت موبايله ولقيت آخر رقم اتصل بيه كان (فريدة)! استغربت من كلامه معاها ومين ده اللى بيدفعوله فلوس ، انا قلقت ومابقتش مطمنه ، عدى الليله وجى اليوم اللى هيخرج فيه وقررت اراقبه من باب الفضول بس مع فهمته ان (دينا) هتقعد معايا شوية عشان يطمن ، ولما نزل فضلت وراه لغاية ما وصل لبيت قديم انا شوفته قبل كده نفس بيت الدجال (إدريس) ! استغربت وقولت ايه اللى جابه هنا المفروض انه مايعرفوش غير عن طريق فريدة لما زورناه وليه بيدفعله فلوس ده كمان بيبتزه وده اللى فهمته من كلامه مع فريدة فى التليفون فضلت منتظره من بعيد لغاية ما خرج وكمان معاه فريدة!! ايه اللى جاب فريدة هنا وبيعملوا ايه عند الراجل ده ولما مشيوا خالص قررت اروح لإدريس ده تانى يوم اكيد وراه لغز كبير ، وفعلاً جهزت فلوس كتير وقررت اروحله ودخلت البيت واديت الست اللى على الباب فلوس عشان ادخله بسرعه وأول ما دخلت وشه اتغير واستغرب لما شافنى
- قولتله انا عاوزه اعرف ايه القصة بالظبط؟ جوزى كان عندك بيعمل ايه امبارح؟
- قالى مفيش كان بيدينى حسابى من آخر مره جيتى فيها
- قولتله بص جوزى مش هيديك فلوس تانى بس انا ممكن اديك اللى انت عاوزه بس تقولى الحقيقة انا سمعته بنفسى وهو بيقول لصاحبتى فى التليفون انه مش هيديك فلوس تانى لو عملت ايه
- إدريس: نعم !! ده اتفاق بيننا ، وكان عليه غضب ربنا وأول ما لاحظت ده طلعت فلوس من شنطتى وقولتله قولى كل حاجة وهديك اللى انت عاوزه بس تصارحنى
- وشه اتغير وقالى خلاص محدش هيقدر ينقذك الجن اللى اتسلط عليكى من أقذر وأشرس انواع الجن ومهمته انك تموتى او تجننى وبكده هما ياخدوا كل حاجة
- مين دول يا شيخ إدريس قولى بالله عليك انا عاوزة اعرف الحقيقة
- بصى جوزك وصاحبتك اتفقوا معايا ان اسلط عليكى مارد يقضى عليكى عشان ياخد كل حاجة ويورثك وده كله هيحصل بعمل سفلى وجوزك جابلى قطر منك وفعلاً عملت العمل ده بس مستحيل يتفك لإن الجن العاشق مش بيسيب حد بسهولة إلا وهو جثة ولو عيشتى هتبقى مجنونة وبالتالى كل فلوسك هتبقى من حق جوزك
- قولتله وانا هتجنن طب واختى؟
- اختك ماعملتش حاجة انا قولت كده بالاتفاق معاهم عشان تفقدى الثقة فيها هى وبنتها عشان تفضلى لوحدك
- اديته فلوس كمان وخرجت وانا مش قادرة اصدق اللى سمعته معقولة هانى يعمل فيا كده وفريدة صديقة عمرى عاوزة تموتنى انا عملتلهم ايه بس!
فضلت اتمشى لوحدى مش عارفة اعمل ايه اتمنيت اموت وقتها بقيت مش عارفة اعمل ايه تمالكت نفسى وقررت ان اعمل الصح حتى لو هموت او اتجنن وفى خلال أيام عملت اللى المفروض يتعمل وكتبت الجواب ده وبعته لدينا بنت اختى
كتبت كل اللى حصل معايا انا عارفة ان كده كده هموت سواء من العمل السفلى او حد هيقتلنى واكيد مش هروح ابلغ عنهم واقولهم دول مسلطين عليا جن انا عارفة انهم مش هيسيبونى وعارفة ان الشيطان ده مش هيسيبنى هو كل يوم معايا وحالتى بتسوق يوم بعد يوم انا اتفقت مع المحامى بتاعى انه يكتب كل حاجة بإسم بنتى (دينا) عشان لما اموت او اتجنن زى ما بيتمنى الكلاب دول يعرفوا الحقيقة فلوسى كلها بقت ملك دينا ومفيش حد منهم هيطول مليم منى
اتمنى تدعولى ربنا يرحمنى من العذاب اللى انا فيه واقابله بأسرع وقت لإن تعبت من الدنيا دى ، انا معرفش ايه مصيرها بس عارفه ان أيامى معدودة اشوف وشكم بخير...
انتهت
المشاركات
تعليقات